Nagalaom ang convenor sang Power Watch nga hatagan sang Central Negros Electric Cooperative sang giya ukon eksplenasyon ang mga konsumedor agud ila maintindihan ang mando sang Energy Regulatory Commission nga bayaran ang overcharged rates sa mga member-consumers.
Sa Notice of Resolution nga gin-issue sa Central Negros Electric Cooperative, Inc. (CENECO), Pangasinan I Electric Cooperative, Inc. (PANELCO I) kag La Union Electric Company, Inc. (LUECO), ginmanduan sang Energy Regulatory Commission (ERC) ang concerned distribution utilities nga irefund ang total over-recoveries nga gincharge sa mga customers.
Nagmandu ang ERC sa CENECO nga ipatuman ang refund sang total net over-recoveries nga nagadangat sa masobra P237.9 million.
Ang total over-recoveries ang natabo halin February 2004 tubtub December 2017.
Ginmanduan man ang distribution utilities nga magsumiter sang monthly report nga nagapakita sang ila narefund tubtub nga maimpas ang kabug-usan nga balor.
Sa interview sang Bombo Radyo kay Wennie Sancho, ginakabig sini nga welcome development para sa mga konsumedor ang mando sang ERC.
Apang suno sa iya, kuntani hatagan sang simple kag maathag nga eksplenasyon sang CENECO ang mga member-consumers agud maintindihan sang mga pumuluyo kag mamumugon kun pila ang ibuhin sa ila mga bill kag ano ang implikasyon sini sa ila kabuhi kag sa ekonomiya.
Ginakwestiyon man ni Sancho kun paano ini atubangon sang electric cooperative bangud sa tuman kadako nga balayran, kun may ginpain sila nga pondo para diri kag kun wala, diin ini pagakuhaon.
Suno sa iya, mas maayo kun i-edukar ang mga konsumedor bangud may mga pamangkot nga dapat masabat kag willing gid ang Power Watch kag Labor sector nga magbulig agud maka-disseminate sang impormasyon.
