Power Watch Negros, ginakondenar ang natabo nga blackout sa Panay Island
Hugot nga ginkondenar sang Power Watch Negros ang natabo nga black out sa isla sang Panay bangod sa kakulangan sa bahin sang National Grid Corporation of the Philippines- NGCP.
Sa interview sang Bombo Radyo Bacolod kay Wennie Sancho, convenor sang Power Watch-Negros, suno sa statement sang NGCP, sa ila nga bahin tubtob lang sila sa transmission kag indi sila makatandog sa intervene sa power generation.
Suno diri, dako ang puder sang NGCP, kag indi husto ang gina-claim sang NGCP nga indi sila maka-intervene sa power generation.
Wala man ini nanamian sa pahayag sang NGCP nga wala man naga-eskplikar sa mga konsumedor kun ano ang natabo apang ang ila pahayag ang daw kaangay nga nagapanindugan sila nga sila ang insakto.
Para kay Sancho, ang NGCP nagapanghinaw sang ila responsibilidad nga kun tani may yara sila sang monitoring kag prevention sang power outage.
Nagapati man ini nga ang NGCP ang nagaserbe bilang manugbantay sang transmission line, kag kun indi nila maprotektahan ang ila trabaho, makaluluoy ang konsumedor bangod sa kapabayaan sang NGCP.
Nagapanawagan man ang convenor sang Power Watch Negros nga kun mahimo nga irevoke ang franchise sang NGCP kag dapat nga mag-imbestigar diri ang gobyerno agud mahatagan sang assurance ang konsumedor nga indi na ini matabo sa liwat.
