Magapatigayon sang press conference subong nga adlaw ang Power Watch Negros agud magpanawagan sang malinong kag orderly nga plebisito angut sa Joint Venture Agreement sa tunga sang Central Negros Electric Cooperative, Inc. kag More Power.
Sa interview sang Bombo Radyo kay Wennie Sancho, convenor sang Power Watch Negros, luyag nila nga i-eksplekar sa mga pumuluyo kag mga konsumedor kun ano ang basehan sang plebisito kag ang ila pagkampanya sang YES para sa JVA.
Suno kay Sancho, hugot sila nga nagapati nga kinahanglanon ini agud marehabilitate ang infrastructure, maislan ang mga transformers kag substations kag mainstall sang MORE Power ang technology kag gadgets nga makapasanyog sang operasyon sang CENECO agud mahatag ang demand indi lamang para sa mga konsumedor kundi sang business sector sa franchise area sini.
Suno sa iya, isa lang kuntani ang issue kag ini ang batunon ukon indi ang JVA paagi sa pagboto sang YES ukon NO apang daw nagdalum na ang issue lakip na ang pagdeklarar sa iya bilang persona non-grata sang progressive labor organizations sa pagpanguna ni Noli Rosales.
Suno diri, indi ini makaintindi kun ano ang ila basehan kag kun kay sin-o authority ang ila deklarasyon kag ginpahayag nga tuman ka out of order ang pronouncement kag indi dapat pagsapakun.
Ginahangkat sila ni Sancho nga mag-execute sang affidavit sa pagdeklarar sa iya bilang persona non-grate kag kun ano ang basehan.
Panindugan sini nga indi makapauntat sa iya sa pagkampanya sang YES para sa JVA ang mga pamahog kag pagpaandam nga iya nabaton.
Nagapanawagan ini nga mangin professional kag atubangon ang matuod-tuod nga issue nga amu ang ratification sang JVA para sa benepisyo sang mga konsumedor.
