Nagfile sang resolution ang Power Watch Negros nga nagapanawagan sa Senado sa pagpadasig sa paghatag sang franchise sa Negros Electric and Power Corp. (NEPC).
Sa Interview sang Bombo Radyo Bacolod kay Power Watch Negros convenor Wennie Sancho, ang Resolution No. 003 series of 2024 ang nadesisyunan sa ginpatigayon nga Power Consumer’s Conference kahapon.
Ini ang ginpanawagan agud mahatagan man sang kasulhayan ang tuman na nga pag-antos nga nagaka-eksperyensyahan sang mga member-consumer sang Central Negros Electric Cooperative Inc. (CENECO).
Suno diri, sobra na ang nagakatabo nga brown-out sa CENECO nga halos kada oras, kada adlaw partikular na kada gab-i nga nagahatag kabudlayan sa pagtulog.
Paathag ni Sancho nga kun may trabaho sa aga, kag indi makatulog sa gab-i bangod sa tuman nga init, ini ang maga-apekto man sa productivity sang empleyado.
Dugang pa ni Sancho nga tuman man ang pag-antos sang mga iloy kun ila ang may magagmay nga kabataan sa nagakatabo nga power outages sa tungang gab-i, bangod ini ang kinahanglan nila nga pulawan sa pagpaypay.
Apang kaangay nga wala lamang sang labot ang CENECO bangod bisan ang mga minimal lamang nga mga problema nga sarang masolbar sa pila ka minutos, nagadangat pa sa inoras antes mapabalik ang kuryente.
Ini bangod tatlo tubtob lima lamang ang response team sang CENECO, kun sa diin bisan 10 lamang gikan sa 61 ka barangay sa Bacolod ang magrequest sang responses, ini ang indi na nila matatapan.
Ginakatingala naman ni Sancho kun ngaa may-ara pa sang nagapamalabag sa paghatag sang prangkisa sa NEPC.
Suno diri, ang Ceneco Union of Irrational Employees (CURE) ang nagapahayag nga magastrike, apang ang nagakatabo nga brown-out ang sobra pa sa pagstrike sang mga ini.
Kaangay nga ginadugangan lamang sang mga ini ang pag-antos sang mga konsumedor.
Wala man ini sang mabatyagan nga simpatya gikan sa CENECO.
Panawagan sini sa CENECO nga magpatawag sang public forum kag ipaathag ang mga rason kun ngaa apisar sa mga pagbrownout, tuman man ang pagtimbook sa bill sang kuryente.
