Pabor ang Parish Pastoral Council for Responsible Voting (PPCRV) sa pagtukod sang Commission on Elections sang task force nga magahatag sang atensyon sa baklanay sang boto subong nga election period.
Suno kay Fr. Chris Gonzales nga amo man ang director sang Social Action Center sang Diocese of Bacolod, maayo gid ang pagtukod sang Comelec sang task force nga magatutok sa vote buying.
Ang PPCRV naman suno sa iya ang nagapatigayon na sang education campaign nga indi magbakal sang boto kag indi magbaligya sang boto bangud makaguba ini sa imahen sang Pilipinas.
Kun indi naman malikawan ang pagbaton sang kwarta suno kay Gonzales, gin-engganyo ang nakabaton nga idonar ini sa simbahan agud nga matipon kag ibakal sang pagkaon para sa mga pigado.
Suno diri, ubra sang yawa ang pagbakal sang boto.
Nagpanawagan man ini sa mga botante nga kabigon nga sagrado ang boto kag blessing ini sang demokrasya bangud may mga pungsod nga indi makaboto ang mga pumuluyo.
Bangud sini, nag-apela ini sa mga botante nga pangamuyuan kag seryosohon ang pagboto kag indi nga lango-lango lang bangud para ini sa bwas-damlag sang tanan.
