Ginapaabot na sang General Manager sa Central Negros Electric Cooperative (CENECO) nga mahatagan na sang prangkisa ang Negros Electric and Power Corporation (NEPC) sa bulan sang Mayo ukon Hunyo.
Nahibaluan nga napasar na sa 2nd reading sa House of Representative kahapon ang House Bill 9805, ang hagna nga magahatag sang prangkisa para maka-operar na ang NEPC.
Sa interview sang Bombo Radyo Bacolod kay Atty Arnel Lapore, sa deliberasyon sang hagana para sa legislative franchise sa Committee Level, siya ang isa sa mga proponents nga nagsabat sa mga pamangkot sang mga kongresista.
Apang wala na ini kahapon sa 2nd reading, kun sa diin nagpatigayon na sang pagboto ang mga miyembro sang Kamara, kag mayorya ang nagpabor.
Pasalig ni Lapore nga preparado ang mga ini nga maghatag sang nagakaigo nga dokumento bilang suporta sa plano, agud nga makabulig sa pagdesisyon sang mga kongresista kun sila ang maga-Yes ukon No.
Matapos sa Kongreso, ipasaka naman ang hagna sa Senado.
Suno kay Lapore wala man ini sang nakita nga mga nagapamalabag sa Senado, kag may ara lamang sang pila ka mga pamangkot nga handa man nila nga sabtun.
Nagapati ini nga openminded ang 24 ka mga Senador kag pila sa ila ang hayagan man ang pagsuporta sa efficient kag effective nga distribution utility.
Samtang wala pa ang prangkisa, ginatinguhaan sang Ceneco kay NEPC ang smooth transition, gani subong pa lamang ginatul-id na nila ang pila ka mga mahimo mangin problema.
Nagakoordinar man ini sa NEPC personnel kag experts kun sa diin sila ang nagapatigayon sang joint activities nga makahatag benepisyo sa ila operasyon.
Pasalig sini nga ang ila nga ginabuhat ang para sa ikaayo sang mga konsumedor, kun sa diin target nga maminimize ang pagluntad sang mga brownout kag makahatag sang bastante nga supply sang kuryente.
