Karun nga uso na ang mga pranks partikular na sa social media, tubtob sa diin bala asta ang malab-utan sang prank nga atun masarangan irisgo?
Isa ka bride sa Florida, USA kag ang caterer sa kasal ang gin-aresto matapos sang ila prank kun sa diin gina-alegar ginlakipan sang mga ini sang marijuana ang ginserbe nga pagkaon sa ginpatigayon nga kasal sang Pebrero.
Santo sa court documents, ginpadulungan sang mga otoridad ang wedding venue nanday Andrew Svoboda kag Danya Svoboda matapos nga pila ka mga bisita ang nagpatawag sang emergency bangod sa paglain sang pamatyag.
Ginpahayag ni Douglas Postma, tiyo sang groom sa mga responders nga nanotisyar sini nga nagakubakuba ang iya nga dughan kag naga-umpisa na ini sa pagpaminsar sang indi amo matapos nga magkaon sang Caesar salad, pasta kag tinapay.
Ang testimonya sini ang kaangay man sa iban nga mga guests sa seremonya nga ginpatigayon sa syudad sang Longwood sa north Orlando, Florida.
Ang asawa ni Postma ang nakabatyag naman sang mas malala nga epekto kag ini ang gin-admit sa ospital kun sa diin nakita sa iya nga dugo ang THC, ang mayor nga psychoactive component sang marijuana.
Ginpahayag naman ni Miranda Cady, abyan sang bride nga kaangay nga daw maga-untat sa pagtrabaho ang iya nga dughan matapos nga ini ang magkaon sang tinapay nga may olive oil.
Ginpamangkot man sini ang caterer nga ginkilala kay Joycelin Montrinice Bryant kun ginsimbugan sini sang marijuana ang pagkaon, nga gilayon naman nga gin-ako sang caterer.
Ginkompirmar man sang bride nga may lakip nga cannabis ukon marijuana ang pagkaon, kag kaangay nga malipayon pa ini sa iya nga prank santo sa statement ni Cady sa otoridad.
Nagkuha man ang mga otoridad sang samples sang pagkaon kag mga gingamit nga glasswares, kun sa diin ang imbestigasyon ang nagatudlo kay Danya Svodoba nga bride kag sa caterer nga si Bryant.
Ang duha ang ginpasakaan sang kaso nga pagbayolar sa layo bato sa food tampering kag marijuana kasubong man ang negligence.
Ang duha ang lunsyar nagpyansa kag maga-atubang sa husgado sa Hunyo.
