Magapatigayon ang Bacolod City Legal Office (CLO) sang pre-demolition conference sa January 13 para sa pagkakas sang structures sa likod sang Manokan Country in Barangay 12, Bacolod City.
Suno kay City Legal Officer Atty. Karol Joseph Chiu nga ang Local Housing Board kaupod ang tiglawas sang Barangay 12, ang nagsugtanay nga mapatigayon sang pre-demolition conference sa nasambit nga petsa.
Suno kay Chiu, ang apektado nga residente ang pagahatagan sang nagakaigo nga tion tubtob sa Enero 28 agud nga magbiya sa lugar.
Ginpahayag man sini, nga ang nagapabilin sa lugar amo ang kapin napulo ka structures kalakip na ang tiyangge kag boarding house.
May yara pa sang nabilin nga 20 ka pamilya nga apektado sa nasambit nga demolition ang wala pa makasaylo sa relocation site samtang ang iban ang nakasaylo na.
May pila man ang wala nahatagan sang relocation site bangud indi ini residente sang ciudad sang Bacolod apang ginhatagan man ang mga ini sang alkalde sang cash assistance.
Napaathagan naman sang Local Housing Board ang mga apektado nga wala naqualify nga mahatagan sang relocation.
Suno kay Chiu, ang proyekto ang para man sa kaayuhan sang ciudad sang Bacolod bangud samtang nagapadayon ang SM Prime Holdings pagtukod sang building para sa bag-o nga manokan country ang nagapatak naman ang renta sini sa ciudad.
