Pre-trial conference sa impeachment case ni VP Sara, natapos na kahapon’ “Mary Grace Piattos,” lakip sa mga pangalan sang testigo

Nagtakop na ang pre-trial conference sa impeachment case ni Vice President Sara Duterte kahapon, apang nagpabilin nga selyado kag wala gihapon nabuksan ang box nga naggikan sa Bureau of Internal Revenue (BIR) nga may unod nga mga tax records sang bise presidente.

Suno sa mga prosecutors, sa subong, wala ginmarkahan bilang ebidensya ang nasambit nga box.

Ila pa anay hulaton ang pahayag sang bahin ni Duterte antes magdesisyon ang Senado bilang impeachment court kun pagabuksan ini kag gamiton bilang ebidensya.

Suno naman kay lead prosecutor kag Batangas Rep. Jinky Luistro, natuman sang prosekusyon ang katungdanan sini nga matapos gilayon ang pretrial conference kag mahanda ang kaso para sa pag-umpisa sang impeachment trial sa Hulyo 6.

Samtang, ginalauman nga magpagwa ang Senado sang pre-trial order nga magaserbe nga giya sa masunod nga mga tikang sa impeachment trial.

Ginlakip sa listahan sang mga testigo sang House prosecution team ang pangalan nga “Mary Grace Piattos.”

Madumduman nga nagagwa sa mga imbestigasyon sadtong 2024 nga ang ini nga pangalan ang nakalista bilang nakabaton man sang confidential funds naggikan sa Office of the Vice President, apang santo sa Philippine Statistics Authority, wala sila sang record sang amo nga indibidwal.

Base sa pre-trial brief, igapresentar bilang witness si Piattos para sa Article 1 nga naga-akusar sa Bise Presidente sang culpable violation sang Konstitusyon, graft and corruption, betrayal of public trust bangud sa ginaalegar misuse sang P612.5 million nga balor sang confidential funds.

Sa bahin naman ni Duterte, handa sila ipaathag ang natuhoy sa paggamit sang mga alyas sa mga ini nga sahi sang transaksyon.