Ginhost sang aktor nga si Marco Gumabao kag reigning Miss Universe Philippines Beatrice Luigi Gomez ang preliminary competition sang Miss Universe Philippines pageant kagab-i, sa Cove Manila Indoor Beach Club sa Okada Manila sa Paranaque City.
Bangud sa mas mahalog nga pandemic protocols, natigayon nga nabuksan sa publiko ang live presentation para sa preliminary competition sang pageant.
Ang 32 ka mga delegates nagikan sa nagkalain-lain nga bahin sang pungsod ang nagtapos sang swimwear kag evening gown segments sa atubang sang mga tumalan-aw nga nagasinggitan kag palakpak sa mga ini kasubong man sa mga katapo sang media.
Magluwas sa pagpakita sang katahum kag “pasare” sang mga delegates, yara man si reigning Miss Universe Harnaaz Sandhu nagikan sa India kag nagperform sanday Anji Salvacion, Gabriel Umali, Yheen kag Yuki, kag Filipino-American rapper nga si EZ Mil.
Ang preliminary competition ang magadeterminar kun sin-o sa mga delegates ang maga-advance sa semifinals kaupod ang mga scores nagikan sa mga interviews nga una na nga ginpatigayon.
Igapasa ni Gomez ang Miss Universe Philippines title sa iya successor nga igaproklamar sa coronation night sa Abril 30 sa Mall of Asia Arena sa Pasay City, kun sa diin si Sandhu ang isa sa mga mangin hurado.
