Naga-umpisa na sa pagpreparar ang Negros Occidental Provincial Government para sa Panaad sa Negros Festival 2025 nga maga-umpisa Marso 24 tubtob 30.
Sa pahayag ni Provincial Administrator Atty Rayfrando Diaz, apisar nga may kalamidad nga nag-igo sa probinsya sa paglupok sang Bulkan Kanlaon, sang Disyembre ginpabatyag gid nila gihapon ang espiritu sang paskwa sa mga evacuation centers.
Pinaagi sini apisar sa trahedya, mapabilin ang yuhom sa mga pumuluyo.
Kaangay man ang rasun sa pagpadayun sang Panaad sa Negros Festival 2025, apisar pa nga ang Panaad Park and Stadium ang isa sa ginatarget nga evacuation site kun maglala pa ang sitwasyon sang bulkan.
Ginpasakaan ang financial subsidy nga ihatag sang provincial government sa mga ciudad sa P400,000 gikan sa P300,000 sang nakaligad nga tuig.
Ini ang para sa repairs kag pagpatahom sa tagsa ka booth sang local government units.
Apang antes ihatag ang financial subsidy, ang kada LGUs ang dapat magpresentar sang program forms kun ano ang irepair kag gastos.
Sa pihak nga bahin ang 128 ka mga kiosk sa San Miguel Park ang mahimo pasakaan pa sa 150 ka kiosk, magluwas sa 20 ka dugang nga kiosk sa Food Alley.
Nagpasalig man si Diaz nga seguruhon nila nga kun sin-o ang winning bidder sa kiosk, sila gid lamang ang magabaligya agud malikawan ang overpricing sang mga baligya.
Nahibaluan nga sang tinalikdan, ginapa-arkila man sang winning bidder ang ila nakuha nga kiosk sa iban, gani nagataas ang presyo bangod sa doble na nga patong.
Plano naman nga sayluhon ang stage nga sa masami nahamtang malapit sa grand stand kag ibutang sa tunga sang field.
P50 million naman ang financial subsidy sa mga lin-ay gikan sa probinsya, nga separado pa sa assistance sang ila banwa kag ciudad.
Suno kay Diaz, ini ang kabahin sa pagselebrar sang pag-isa sang probinsya, kag pinaagi sa selebrasyon ila ipakita ang pagbinuligay sang mga Negrense.
