Nagsapol sanday Office of the Civil Defense (OCD) Undersecretary Ariel Nepomuceno, OCD Region 6 Director Raul Fernandez, OCD Negros Island Region Director Donato Sermeno, kag Antonia Bornas sang PHIVOLCS, kag La Castellana Mayor Rhummyla Nicor Mangilimutan kag Governor Bong Lacson kag Provincial Administrator Atty. Rayfrando Diaz kahapon agud ma-estoryahan ang preparasyon sa ginalauman nga pagsaka sa alert level 4 sang status sang bulkan Kanlaon.
Sa interview sang Bombo Radyo kay OCD Negros Island Region Director Donato Sermeno, 1,350 ka mga tents ang igatukod sa Tent City kag iban diri ang natukod na sa bahin sang banwa sang Pontevedra kag Himamaylan City samtang may yara pa sang ginapa-abot nga dugang nga tents.
Ang tent city ang ginpatukod agud tiniran sang mga evacuees sa ginalauman nga magdangat sa kapin sa 100,000 ka mga indibidwal ang i-evacuate kun magsaka sa alert level 4 ang status sang bulkan.
Suno kay Sermeno, madamo pa sang ginsturyahan kaangay sa pagmanage sa mga evacuees, sa mga pagkaon, sa accommodation, water filtration facilities, kag mga hilikuton sa pag-evacuate sa mga pumuluyo kag iban pa.
Samtang, ginpahayag man ni Sermeno nga indi man mapunggan ang tawo nga indi magbalik sa ila mga puluy-an kun diin nabutang ang ila palangabuhian apang nagapanawagan ini sa mga Local Government Units nga kumbinsihon ang mga evacuees nga indi anay magpauli bisan pa nga sa gwa sang 6km danger zone sila naga-istar bangod sa mga indicators nga nagakit-an sa bulkan nga ini ang liwat nga maglupok.
