BACOLOD CITY — Nagapanawagan ang mga pumuluyo sang ciudad sang Marawi nga nag-evacuate sa ciudad sang Dumaguete, probinsiya sang Negros Oriental kay Presidente Rodrigo Duterte nga dulugan na ang gyera sa ila nga lugar kag batakon naman ang gindeklarar nga martial law sa Mindanao.
Sa interview sang Bombo Radyo kay a certain Monie (mu-ni), ginahingyo sini si Presidente Duterte nga untatan na ang bakbanakay sa Marawi bangud nagahatag ini sang tuman nga kakulba sa mga sibilyan samtang ang ila dutang-natawhan ang nawasak na kag wala na sila sang mabalikan.
Ginpabutyag sini nga wala sang kahilabtanan ang mga sibilyan sa ginahimo nga kalakasan sang Maute Terror Group nga ginaangot naman sa terorista nga ISIS.
Ginahingyo man ni Monie si Presidente Duterte nga batakon na ang gindeklarar nga martial law sa Mindanao bangud tuman na ka apektado ang palangabuhian, indi lamang sang mga taga-Marawi, kundi subong man sa bug-os nga rehiyon.
Nahibaluan nga wala na sang pagkaon, tubig kag mangin suplay sang kuryente sa Marawi kag kaiping nga mga lugar samtang wala man sang bastante nga bulig nga nagaabot didto.
Ang mga evacuees ang nagapuyo sa evacuation center sa Barangay Poblacion 8, ciudad sang Dumaguete.
Samtang, sa pihak sang nasaksihan nga terorismo nga gintuga sang Maute Terror Group, luyag sa gihapon sang mga tumandok sang ciudad sang Marawi nga magpauli kag magbalik sa pagpangabuhi sa ila dutang-natawhan.
Sa interview sang Bombo Radyo sa mga evacuees nga nagadayon sa evacuation center sa Barangay Poblacion 8, ciudad sang Dumaguete, ginpabutyag sang mga ini nga ila na lamang ginahulat nga magtawhay kag magbalik ang kalinong sa ciudad sang Marawi kag gilayon sila magabalik didto.
Suno kay Nordiana Ampatua, isa sa mga ulihi nagbakwit sa Dumaguete, ila ginbilin ang ila puluy-an kag duta nga ginalauma agud lamang makalikaw sa kalakasan nga gintuga sang Maute Terror Group kag opensiba sang militar batok sa mga terorista.
Wala man ini sang dala nga kwarta kag kagamitan magluwas sa mga panapton nga ila ginasuksok.
Samtang, ginpabutyag sini nga madugay na nila nabatian ang ngalan nga Maute apang subong lang nila nahisayran nga konektado ang grupo sa terorista nga ISIS.
