Ginpahayag ni President Ferdinand “Bongbong” Marcos Jr. nga plano sang gobyerno nga magtukod sang linibo nga mga solar-powered irrigation units agud makabulig sa pagpasanyog sang harvest sang mga mangunguma, karun nga ginapreparahan ang mahimo impact sang El Niño phenomenon.
Sa speech sang Presidente sa ceremonial palay harvesting kag distribusyon sang assistance sa mga mangunguma kag kooperatiba sa Pampanga, ginduso sini ang solar-powered irrigation.
Kasunod sang speech sang Presidente, ginpahayag sang Presidential Communications Office (PCO) nga ang gobyerno ang nagtigana sang P17 billiin para sa Philippine Solar Irrigation Project.
Suno kay Marcos, nakasugilanon na sini si Agriculture Secretary Francisco Tiu Laurel Jr. natuhoy sa inisyatibo matapos ang pagbisita sini sa Vietnam, nga isa sa mga pungsod nga nagmadinalag-on sa paggamit sang solar technology sa agrikultura.
Nahibaluan nga ang Vietnam ang top exporter sang bugas sa Pilipinas.
Suno kay Marcos, pasanyugon sang mga ini ang irrigation sa mga humayan pinaagi sa Philippine Solar Irrigation Project kag small-scale irrigation projects agud mapasanyog ang produksyon kag income sang mga mangunguma.
Ang kada unit ang may ikasarang nga makaserbisyo sa 20 ektarya nga humayan pinaagi sa irrigation pumps.
Suno sa Presidente, maga-install ang mga ini sang linibo ka units, kag ginadiskusyunan na kun sa diin kuhaon ang pondo.
