Naghatag lamang sang napulo ka adlaw si President Ferdinand “Bongbong” Marcos nga matukod ang Task Force Relocation may kaangtanan sa paglupok sang Bulkan Kanlaon.
Sa interview sang Bombo Radyo Bacolod kay Office of Civil Defense – Negros Island Region Director Raul Fernandez, target sini nga marelocate ang mga nagapuyo sa sulod sang 4km Permanent Danger Zone sang Bulkan Kanlaon.
Samtang himuan naman sang Permanent Evacuation Center nga mahamtangan sang mga pumuluyo sa sulod sang 6km Extended Danger Zone inkaso maglupok ang Bulkan.
Suno kay Fernandez, 83 ka pamilya ang kabug-usan nga pangitaan sang relocation nga ginabug-usan sang 36 ka pamilya gikan sa banwa sang La Castellana, Negros Occidental kag 47 ka pamilya gikan sa Canlaon City, Negros Oriental.
Bilang head sang Task Force Kanlaon, sila ang incharge sa response operation, samtang ang Task Force Relocation naman ang sa rehabilitation kag recovery.
Sila ang magameeting sa Lunes para sa pagtukod sang bag-o nga Task Force, nga paagi man agud maplastar ang mga long term solutions agud mapahagan-hagan ang epekto sa tion nga maglupok ang bulkan.
Kasubong man ang effort nga mapabalik sa normal nga pagpangabuhi ang mga apektado nga populasyon.
Sa pagpangita sang hamtangan sang mga relocation site kag permanent evacuation center, sila ang nagadangop man sa Philippine Institute of Volcanology and Seismology agud maseguro nga safe ang sayluhan nga lugar.
Paathag ni Fernandez nga bangod indi naman masaylo ang Bulkan Kanlaon, ang mahimo na lamang nila amo ang mapalayo ang mga pumuluyo sa dako nga risgo.
Panugyan sini sa mga Internally Displaced Persons (IDPs) nga manguyat lamang kag indi madulaan sang paglaom bangod ang Gobyerno ang nagahatag sang suporta.
Nagahingyo man sila sang kooperasyon gikan sa publiko sa pagsalig kag pagsunod sa otoridad, kaangay sa mga panawagan sang evacuation.
