Nagmando si President Ferdinand Marcos Jr. sa mga law enforcement agency sa Zamboanga City sang isa ka maid-id nga imbestigasyon angot sa madugo nga insidente sang pagpangluthang kahapon sang aga, Agosto 18, sa Ateneo de Zamboanga University agud matumod ang ugat sang trahedya kag malikawan ang kaangay nga insidente.
Nagpakig-unong man ang Presidente sa mga pamilya kag sa bug-os nga komunidad sang Ateneo de Zamboanga nga naapektuhan sang trahedya.
Magluwas sa seguridad ginpaathag ni Presidential Communications Office (PCO) Undersecretary Claire Castro ang importante nga papel sang mga ginikanan kag manunudlo sa paggiya sa mga kabataan.
Suno diri, dapat mangin maayo nga ehemplo ang mga teachers kag ang mismo nga eskwelahan para sa pagtudlo sang maayo nga pamatasan kag paghatag importansya sa mga estudyante.
Samtang, nagpagwa naman sang statement ang Ateneo de Zamboanga University kag nagsiling nga nagakooperar sila sa mga otoridad sa padayon nga imbestigasyon.
Sa video nga gin-post sang unibersidad sa social media, ginpahayag ni University President Father Ernald Andal nga indi nila pangunahan ang imbestigasyon sang mga otoridad.
Suno diri, nagapakig-angot man sila sa mga pamilya sang apektado nga mga kabataan kag magahatag man sila sang bulig kaangay sang pastoral kag psychological support.
Ginahibalo na ang bug-os nga detalye kag motibo sa nasambit nga insidente.
