Nag-abot kagab-i si President Ferdinand “Bongbong” Marcos Jr. sa Dumaguete City, Negros Oriental agud nga magbisita sa haya ni Negros Oriental Governor Roel Degamo sa ila nga balay sa Barangay Junob.
Ginpangunahan ni Dumaguete City Mayor Felipe Remollo ang pag-abi abi kay President Marcos.
Kaupod sini sa pagbisita sa haya sang gobernador si Interior Secretary Benhur Abalos kag Justice Secretary Jesus Crispin Remulla.
Ginpasiguro naman sini sa tiayon sang gobernador nga si Pamplona Mayor Janice Degamo kag sa pamilya sang walo ka mga sibilyan nga napatay man sa assassination sang gobernador nga mahatagan sang nagakaigo nga hustisya ang kamatayon sang mga biktima.
Ang bangkay ni Degamo ang igabyahe karun padulong sa Provincial Capitol kun sa diin magatinir ini tubtob sa Domingo ukon Lunes.
Sa Lunes sang aga, ini ang igabyahe padulong sa Siaton, Negros Oriental – sa balay sang ginikanan sini kag kun sa diin siya ginbun-ag.
As of today, sa Huwebes sa masunod nga semana, Marso 16, ang schedule sang interment sang gobernador, bangud ginahulat pa ang pag-abot sang utod sini gikan sa Estados Unidos.
