Ginpangunahan ni President Bongbong Marcos ang opisyal nga pagbukas sang 2024 Palarong Pambansa sa Cebu City Sports Center kahapon.
Nagparada ang kapin sa 18,000 atleta gikan sa 19 tanan ka delegasyon sa bilog nga pungsod.
Sa speech ni President Ferdinand ‘Bongbong’ Marcos Jr, iya ginpahayag nga paagi sa Palarong Pambansa, madiskubrehan ang future athletes, olympians kag leaders sang Pilipinas.
Nagapati man ini nga madamo sang mangin champions kag record holders sa katapusan sang hinampang.
Luyag man sini nga kabigon ang sport event nga tion para mapakita ang talento kag pride bilang isa ka Pilipino.
Wala naman nagpakita sa opening ceremony sang Palarong Pambansa 2024 sa Cebu City si Vice President Sara Duterte.
Sa baylo sini, si Department of Education Assistant Secretary Francis Bringas ang nagraise sang Palarong Pambansa banner kaupod sanday Philippine Sports Commissioner Chairman Richard Bachmann kag Department of Interior and Local Government Region 7 Director Leocadio Trovela.
Suno kay DepEd spokesperson Usec. Michael Poa, nagbisita ang bise-presidente sa mga student-athletes nga naga-eksperyensya sang sintomas sang dengue sa ospital apang nagpadala ini sang isa ka mensahe sa mga atleta.
Sa mensahe sini, iya ginpahayag nga kadungan sang pagbukas sang Palarong Pambansa 2024 sa Cebu City, pangamuyo sini kag handom nga maduso ang nagakaigo, timely kag dekalidad nga edukasyon para sa mga pamatan-on nga Filipino.
Ginpahayag man sini nga ang Palarong Pambansa 2024 amu ang dedikasyon sang ahensya sa mga estudyante.
Ginpasalamatan sini ang mga manunudlo, coaches, technical staff kag tanan nga kabahin sang organisasyon sang Palarong Pambansa.
Madumduman nga una nga nagkumpirmar ang bise-presidente sang attendance sa Palarong Pambansa Opening Ceremonies sang Hunyo 29.
https://www.facebook.com/61555977914604/videos/995483908551803
Si President Ferdinand Marcos Jr. ang nalakip man sa mga imbitado nga guest sa opening ceremony.
