Gin-athag sang Executive Assistance III sa Housing Cluster sang Bacolod City Government nga wala nadayun ang turn over ceremony sang mga Housing unit sa Yuhum Housing Village subong nga adlaw bangod sa may-ara sang iban nga aktibidad si President Ferdinand “Bongbong” Marcos Jr.
Nahibaluan nga ang Yuhum Housing Village ang pinakauna nga proyekto sa idalum sang Pambansang Pabahay para sa mga Pilipino (4PH) Program sang Marcos Administration, gani ang Presidente man ang nakaschedule nga magpanguna sa turn over ceremony sini.
Sa interview sang Bombo Radyo Bacolod kay Rodel Parcon, natabuan nga natapos na sang Kamara ang 2024 General Appropriations Act (GAA) kag ini ang nagakinahanglan naman sang pirma sang Presidente.
Sa karun, sila ang ginhatagan sang tentative date nga Enero 27 sa masunod nga tuig para sa turn over ceremony.
Nahibaluan nga sang nakaligad nga adlaw, una naman nga gin-athag ni Bacolod City Mayor Alfredo “Albee” Benitez nga luyag man sang Marcos Administration nga idungan na lamang ang turn over ceremony sa launching sang “Bagong Pilipinas” sa Enero.
Sa pihak nga bahin, imbes nga duha 4-storey condo type building lamang kuntani ang i-turn over subong nga Desyembre 20, mahimo nga tapuson na lamang ang apat ka 4-storey building agud dungan nga maturn-over ceremony sa Enero.
