Handa na ang seguridad para sa pagbisita ni President Ferdinand ‘Bongbong’ Marcos Jr. sa haya ni Negros Oriental Governor Roel Degamo sa ila nga balay sa Barangay Junob, Dumaguete City karon sa kasisidmon.
Sa interview sang Bombo Radyo kay Dumaguete City Mayor Felipe Antonio Remollo, yara ang mga suldado kag kapulisan para sa security sang presidente.
Nagpasalamat ini sa presidente bangud bisan tuman ka sako ang schedule sini, may tion ini gihapon agud nga magbisita sa haya sang gobernador.
Nahibaluan nga si Degamo ang supporter ni Marcos kag sa presidente man ini nag-take sang iya nga oath sang Oktubre tuig 2022 sang ginpagwa sang Commission on Elections ang ruling nga siya ang nagdaog nga gobernador sang Negros Oriental.
Nakig-unong naman ang pila ka mga senador nga nagbisita man sa haya sang gobernador sa puluy-an sini.
Ginpasalamatan man sang alkalde ang mga senador nga naghatag sang oras nga magbistia ilabi na sa presidente nga may puno nga schedule.
Suno kay Remollo, dako na nga butang ang presensya sang mga opisyales ilabi na sa pamilya sang walo ka iban pa nga ginmassacre sang mga suspetsado sa balay sang gobernador sa Barangay San Isidrio, Pamplona sang Sabado sang aga.
Samtang, aminado naman si Remollo nga natublag sila sang natabo nga pagpatay sa gobernador kag walo ka sibilyan bangud ang Dumaguete City ang peace-loving community.
