Nagpasalig si President Ferdinand “Bongbong” Marcos Jr. sa publiko sang padayon nga tikang sang gobyerno matapos ang paglupok sang Bulkan Kanlaon.
Sa isa ka video message, ginpahayag ni Marcos nga ang Philippine Institute of Volcanology and Seismology (Phivolcs), National Disaster Risk Reduction and Management Council, kag Department of Social Welfare and Development ang gilayon nga nagahatag sang assistance sa mga apektado nga mga residente sang Negros Island.
Suno sa Presidente, nakadeploy na sang sleeping kits sa La Castellana, ang banwa nga yara sa idalum sang Mt. Kanlaon.
Kapin 13,000 ka mga family food packs ang napreposition sa Negros Island kag dugang nga 40,000 ka mga food packs kag non-food items ang padulong na sa mga apektado nga mga areas.
Suno sa Presidente, nakastandby man ang mga air asset para sa mas mabilis nga pagresponde.
Ginasiguro man sini nga handa ang gobyerno kag padayon nga nagahatag sang suporta tubtob nga makabalik nga luwas ang tanan sa ila mga puluy-an.
Gintapos sang chief executive ang iya mensahe paagi sa pagpanawagan sa mga residente, ilabi na ang mga malapit sa apektado nga mga areas, nga magpabilin nga mabinantayon, likawan ang pagtinir sa four-kilometer radius permanent danger zone kag sundon ang mga guidelines kag mga pagsulundan sang mga otoridad.
