Liwat nga ginkilala ni President Ferdinand Marcos Jr. ang importante nga papel sang main stream media sa pagpakigbato sang kinamatarong sang mga pumuluyo kag pagpalapnag sang kamatuora paagi sa broadcast.
Kadungan ini sang paghiwat kahapon sang 50th anniversarry sang Kapisanan ng mga Brodkasters ng Pilipinas (KBP).
Una diri, ginpahayag sang chairman sang KBP nga si Bombo Herman Basbaño nga ang organisasyon sang mga broadcasters ang gintukod sadtong Abril 27, 1973 sa panahon ni former President Ferdinand Marcos Sr., kag makaligad ang 50 ka tuig nangin dinapit naman nga bisita kag keynote speaker si President Ferdinand Marcos Jr para sa pagselebrar sang 50th anniversary sang organisasyon.
Ginpasalamatan sini ang pagtambong sang presidente agud mangin keynote speaker sa nasambit nga event.
Suno kay Basbanio, ang golden age ang ginakabig sang mga ulihing tubo nga cool ini bangud isa ini ka achievement sa madamo nga aspeto.
Suno pa diri, ang gold ang isa ka malahalon nga commodity bangud tubtob sa karun ang kwarta sang isa ka nasyon ang ginabase sa gold reserves sini agud nga magrepresentar sang prosperity, beauty kag significance sang pagexister sini sa sulod sang 50 ka tuig.
Ang pagselebrar sang golden anniversary sang KBP ang nagapakita lamang kun ano kanami ang mga experiences kag nagapakita man sang standard self regulation nga nagaidlak sa pagselebrar sang golden glory sini sa pihak sang madamo nga nagatuhaw nga misinformation kag ginalauman pa nga magalawig ang KBP tubtob sa isa ka gatos nga tuig.
Gindayaw naman sang presidente ang dako nga bulig sang broadcast industry para mapabilin nga mabakod ang demokrasya.
Ginpahayag man sang presidente nga ipadayunon sang administrasyon ang pagpanindugan sa freedom of the press kasubong man ang kinamatarong kag seguridad sang media practitioners sa pungsod.
Dugang pa sang presidente nga samtang ang madugay nga tinuig, ginpatud-an sang KBP nga ini ang nakaestablisyar na sang kaugalingon sini bilang institution sang national significance
Nagapabilin man ang role sang organization nga “crucial” samtang ang pungsod ang nagapadayon sa pagpangatubang sang mga bag-o nga pagpanghangkat nga ginalakipan sang pagduging sang misinformation, disinformation, kag fake news.
Ginkasubo man ni Marcos ang manubo nga pwesto sang Pilipinas sa World Press Freedom Index, kun sa diin yara ini sa ika-147 sa 180 participating countries sa 2022.
