Antes ang ika-126 nga Independence Day sang Pilipinas, ginpatpat ni President Ferdinand Marcos Jr. ang importansya sang pagpadayon sang pagpakigbato para sa kahilwayan ilabi na sa pagprotekta sang teritoryo kag soberenya sang Pilipinas.
Wala sang may ginlawag nga maskin ano nga pungsod si Marcos apang naghatag ini sang statement sa iya vlog kun sa diin may mga snipets sang iya keynote speech sa International Institute for Strategic Studies’ Shangri La Dialogue kun sa diin gincriticize sini ang illegal incursions sang China sa exclusive economic zone sang Pilipinas.
Suno sa Presidente, sa nagligad nga 126 ka tuig kag tubtob sa karun, padayon ang pagpakigbato sa atun kahilwalyan sa nagkalain-lain nga aspeto sang pagka-Filipino kag kahilwayan sa teritoryo kag soberenya.
Gani wala untat ang pagbantay sang pungsod kag pagpatigayon sang meeting kaupod ang iban nga pungsod agud mabuligan ang Pilipinas nga maduso ang ikaayo kag kinamatarong.
Suno pa kay Marcos, may mga ginlunsyar na nga mga cultural projects ang gobyerno agud magpadayon sa pagpreserve sang identity sang mga Filipinos kag ginhangkat ang mga pumuluyo nga mangin aktibo sa pagpartisipar sa mga events nga nagacommemorate sang ika-126 nga Independence Day sang Pilipinas sa Hunyo 12.
