Ginpangunahan ni President Ferdinand R. Marcos Jr ang pagdumdom sang ika-80 nga anibersaryo sang kahilwayan sang Manila sa Manila American Cemetery and Memorial sa ciudad sang Taguig.
Nagtambong man sa nasambit nga aktibidad ang mga tiglawas nagikan sa gobyerno sang Estados Unidos, mga kilala nga personalidad sa pungsod, kag mga beterano sang World War II agud nga mapasidunggan ang mga naghalad sang ila kabuhi sa isa sa mga pinakamalala nga inaway sa maragtas sang Pilipinas.
Ang Battle of Manila sang Pebrero 1945 ang nagmarka sang katapusan sang pagsakop sang mga Hapon sa Pilipinas apang nagtuga ini sang tuman nga kahalitan.
Linibo nga mga sibilyan nga Pilipino kasubong man ang mga suldado nga Amerikano kag Hapon ang napatay sa inaway nga naguba sang capital sang Pilipinas.
Sa mensahe sang presidente, ginkilala sini ang mga hinimuan sang mga beterano nga hangaway agud nga makuha ang kahilwayan nga gina-enjoy sang mga Pilipino sa karun.
Ginpasalamatan sini ang mga suldado nga naghatag sang ila nga mga kabuhi para sa kahilwayan sang Manila.
Ang mga makasaysayan nga lugar kaangay sang mga simbahan, eskwelahan kag mga buildings sang gobyerno ang naguba kag ang bug-os nga komunidad ang nadulaan sang puluy-an.
Ang Manila American Cemetery ang ginlubngan sangb 17,000 nga miyembro sang American service kag memorial sang kapin 36,300 ka indibidwal nga nadula sa inaway.
Kalakip sa mga ginpasidungan amo ang mga nahatagan sang Medal of Honor, mga suldado nga Pilipino kag mga pamilya nga nagserbisyo sa pungsod sa tunga sang inaway.
Samtang ginadumdom sang pungsod ang makasaysayan nga hitabo, ang paghanduraw ang nagserbe nga patimaan sang mga sakripisyo nga ginhimo para sa kahilwayan kag ang epekto sang inaway sa maragtas sang pungsod.
