Ginpanindugan ni US President Joe Biden nga ang pungsod kag ang ila nga mga kaalyado ang wala sang kaangtanan sa nagluntad nga uprising sang mga mercenaries sa militar sang Russia.
Ini ang kadungan sa padayun nga monitoring sang madamo nga mga pungsod sa potensyal nga epekto sang mga hitabo sang weekend.
Sa labing una sini nga pagpagwa sang public comment humalin sang pagrevolt sang Wagner Group, ginpahayag ni Biden nga nakasugtan sini kag sang ila mga nagapanguna nga kaalyado, nga indi paghatagan sang rasun si Russian President Vladimir Putin nga mabasol ang isyu sa West ukon sa North Atlantic Treaty Organization (NATO).
Sa White House, ginpahayag ni Biden nga ginpaseguro na nila nga sila ang wala sang kaangtanan, kag ini ang problema sa sulod sang Russian system.
Nangin mahinalungon naman ang Presidente sa ginabuy-an nga tinaga natuhoy sa insurrection, nga sa madumduman nagbatun na sang mga seryoso nga paandam gikan kay Putin sang nakaligad nga tinuig, kun sa diin ginpahayag lamang sini nga ang impact sang hitabo sa Russia ang indi pa matumod sa karun.
Dugang pa sini nga ipadayun lamang nila ang assessment sa mangin resulta sang hitabo sang weekend kag ang implikasyon sini sa gyera sa tunga sang Russia kag Ukrain.
Madumduman nga kasunod sa pagpanguna sa makadali nga insurgency attempt, gilayon naman nga gin-anunsyar ni Yevgeny Prigozhin, ang founder sa paramilitary group nga ginabatak na sini ang mando sa pag-atake sang iya nga mga fighters sa Moscow agud malikawan ang pagdanak sang dugo.
Sa ginpagwa nga audio message ni Prigozhin sang Lunes, gin-athag sini nga wala sila nagatuyo nga puhagon ang pagpamuno sa Moscow, kundi ang pagmartsa ang demonstrasyon lamang sang ila nga pagprotesta batok sa unprofessional management sang Russia sa gyera sa Ukraine.
Kasunod sina, nagpagwa naman sang televised address si Putin, nga nagakondenar sa mga yara sa likod sang pagmartsa kag ini ang gintawag nga traidor.
Bangod sa pabag-o bag-o nga sitwasyon, nagpasalig si Biden nga seguruhon sang Estados Unidos kag mga kaalyado sini nga tun-an nila sang ululupod ang issue kag sila ang magaresponder santo sa sitwasyon.
Dugang pa sini nga nakighinun-anon man ini kay Ukrainian President Volodymyr Zelenskyy agud padayun nga mapalab-ot sa iya ang ila nga analysis.
Ginpasalig man sini kay Zelenskyy nga ang Estados Unidos ang magapadayun sa pagsuport sa defense kag sovereignty sang Ukraine bisan ano paman ang natabo sa Russia.
