Hugot nga ginkondenar ni President Ferdinand Marcos Jr. ang natabo nga air incident sa bahin sang Bajo de Masinloc kun sa diin nagbuya sang “dropped flare” ang multirole aircraft sa ruta nga ginaagyan sang Philippine Air Force (PAF) nga nagapatigayon sang routinary maritime patrol sa teritoryo sang pungsod.
Nagaugyon ang Presidente sa maisog nga personnel sang PAF.
Ginpahayag sang Presidente nga ang tikang sang People’s Liberation Army – Air Force (PLAAF) ang unjustified, illegal kag reckless ilabi na nga nagalupad ini sa air space sang Pilipinas.
Gin-emphasize sang Presidente nga sa karun nga nagkalma na ang kadagatan, naghimo nanaman ang China sang delikado nga tikang sa airspace.
Dugang pa sang Presidente nga magapabilin nga committed ang Pilipinas para sa isa ka diplomasiya kag matawhay nga pamaago sa pagresolba sang bisan ano nga indi pag-instindihanay.
Nagpanawagan ang presidente sa China nga mangin responsable sa ila nga tikang sa dagat man ukon sa kahawaan.
” We strongly urge China to demonstrate that it is fully capable of responsible action, both in the seas and in the skies,” pahayag ni Presidente Marcos.
