Ginpangunahan ni President Ferdinand R. Marcos Jr. ang pagpanagtag sang kapin P608 million nga financial support sa agricultural projects, kag iban pa nga bulig nagikan sa national government paagi sa ceremonial turn-over sa ciudad sang Bacolod kahapon.
Ang aktibidad ang ginpatigayon sa football field sang University of Negros Occidental-Recoletos (UNO-R).
Sa speech sang presidente, ginpahayag sini nga nagpadulong sila sa ciudad sang Bacolod agud nga ipabatyag ang ila nga pagpalangga kag pagsuporta para sa matuod nga baganihan sang atun pungsod, ang mga mangunguma kag mangingisda bangud sa wala sang katapusan nga pagpaninguha sang mga ini para sa pungsod.
Ini ang mensahe sang presidente sa atubang sang linibo nga mga benepisyaryo sang El Niño cash assistance sa Negros Occidental kag sa ciudad sang Bacolod.
Ginhinambit man sang presidente ang Negros Bacolod Economic Highway kag ang Yuhum Housing program nga dako ang mga mabulig sa mga pumuluyo kag sa pagsanyog sang ekonomiya sang ciudad sang Bacolod kag probinsya sang Negros Occidental.
Nagpasalig man ang presidente nga indi sini kag sang gobyerno pagpabay-an ang mga mangunguma kag mga mangingisda bangud sa ginapangatubang nga pagbag-o sang klima kag mga kalamidad.
