Mangin isa ka pamatuod ang housing project sang gobyerno nga ginahatagan gid sang pagtamod ni Presidente Rodrigo Duterte ang housing need sang kada isa ilabi na ang mga militar kag kapulisan nga nagasugal sang ila kabuhi para sa pungsod.
Ini ang ginpahayag sang presidente sang siya ang nagtambong sa groundbreaking ceremony sang AFP-PNP Housing Project sa Barangay Dos Hermanas, Talisay City, Negros Occidental kahapon.
Takna alas-5:15 sang hapon sang nag-abot ang ginasakyan niya nga presidential chopper sa nasambit nga lugar.
Siya ang ginsug-alaw sang pila ka mga opisyal sang ciudad sang Bacolod kag probinsya sang Negros Occidental ilabi na ang mga opisyal sang ciudad sang Talisay.
Ang nasambit nga housing project ang may project name nga Vista Alegre Homes nga may 15 tanan ka hektarya sa kabug-usan.
May yara naman sang 1,000 ka mga housing units ang itukod sa lugar para sa mga AFP/PNP personnel.
Ang kada unit ang may 80 sq. meters nga kalaparon kag nagabalor sang 1.1 tubtob 1.2 million.
Ang mga benepisyaro ang may yara sang P4,900 tubtob P5,100 nga monthly fee.
Si Janette Cajaban nga asawa ni anay Sergeant Miljun Cajaban kag taga Brgy. Villamonte nga napatay sa encounter sa Bohol sang una ang isa sa mga benepisyaro sini.
Suno sa iya, dala ang housing project sa mga benefits nga ila nakuha kag na-award na ini sa ila sang nagligad pa nga tuig matapos sila makapasa sang requirements.
Ang Vista Alegre Homes ang ika-apat nga proyekto sa idalum sang AFP/PNP housing program.
Sa kabug-usan, 11 tanan ka mga housing projects ang ipatukod sa nagkalain-lain nga bahin sang pungsod para sa AFP, PNP, BFP, BJMP kag BUCOR personnel.
