Birthday wish ni Presidente Rodrigo Duterte ang isa ka matinlo, patas kag tampad nga eleksyon sa Mayo 2022.
Sa statement nga ginpagwa ni Acting Presidential Spokesperson Martin Andanar, nga si Presidente Duterte ang magapatigayon sang simple kag malinong nga birtday celebration sa Davao City.
Suno kay Andanar, gina-upod nila ang mga pumuluyo sa pagtamyaw sang happy 77th birthday sa pinalangga nga Presidente Rodrigo Roa Duterte subong nga adlaw Marso 28.
Dugang pa sini nga ang birthday wish sang presidente subong nga tuig amo ang matinlo, patas kag tampad nga eleksyon sa Mayo 2022, kadungan sa pagpahanumdom sa importansya sang matawhay nga pagbaylo sang gahom bilang kabahin na sang iya nga legasiya.
Ginpasalamatan man ni Andanar ang Presidente sa pag-inspire sa iban nga mga government officials.
Wish man sini ang maayo nga physical kag mental health para sa Presidente agud nga mapadayun sini ang pagserbe nga may tinutuyo nga mahatag ang kaayuhan sa kabuhi sang mga Pilipino.
Suno kay Andanar, ila nga ginapalab-ot ang sensero nga pagpasalamat sa Chief Executive nga bangod sa mabaskog kag decisive nga pagpamuno kag genuine compassion para sa tanan nga Filipino, na-inspire sini ang mga opisyales sa gobyerno nga nagresulta sa positibo kag may kapuslanan nga pagbag-o sa kabuhi sang tuman ka damo nga mga pumuluyo.
