Nagpanindugan si Presidente Rodrigo Duterte nga ang Pilipinas ang dapat magpabilin sa iya commitment sa joint development sang resources sa Recto Bank kaupod ang China, kag nagpaandam nga ang pungsod ang indi preparado nga makaangkon sang konflikto sa mga kaingod sini.
Sa Talk to the People ni Duterte kagab-i, ginpahayag sini nga madamo sang mga flashpoints kag indi nila ini kinahanglan.
Suno sa iya, indi kinahanglan sang Pilipinas nga makig-away kag sundon lamang kun ano ang naistoryahan sadto, consensual talk tapos may yara sang written agreement.
Gindugang man sini nga dapat magpabilin lamang nga cool kag chill.
Suno kay Duterte, posible nga indi sa henerasyon sa karun masolbar ang problema sa China.
Suno pa diri, wala sang may nakahibalo kun ano ang matabo apang sa karun, dapat magrelax lamang, indi pagtemptaron ang mga may gahom kag indi magpanghangkat kun indi man masarangan bangud kita ang mabudlayan lamang.
Suno kay Duterte, may isa ka contractor nga luyag kuhaon ang exploration project sa lugar, nga yara sa exclusive economic zone sang pungsod.
Apang wala naman sini ginpangalanan ang firm ukon ang tawo.
Suno sa iya, may naghambal sa iya nagikan sa China nga ginpadumdum ang joint development sang Pilipinas kag China sa Recto Bank apang may nagagwa nga istorya nga may mabulos na.
Ginhutikan siya sang nasambit nga persona nga indi ini insakto kag dapat sundon gid ang orihinal nga kontrata.
Suno sa Presidente, kun lainon, mas delikado, kag indi ini matabo bangud indi luyag ni Duterte nga lainon ang ila gin-istoryahan sa iya termino.
Ginpahayag man sini nga may naghambal sa iya nga ang Pilipinas ang luyag magdeploy sang mga suldado sa Recto Bank apang iya ini ginpanginwala kag nagpanindugan nga wala sang plano nga magpadala sang mga suldado.
Suno diri, iya ini ginalikawan bangud sa nagakatabo sa karun sa Ukraine kag sa Taiwan.
Sang Nobyembre 2018, ang Pilipinas kag China ang nagforge sang memorandum of understanding (MOU) sa cooperation sa oil and gas development sa South China Sea, isa ka bahin nga ginclaim sang Manila nga West Philippine Sea.
