Samtang nagahilapit ang eleksyon, ginpahayag ni Presidente Rodrigo Duterte nga iya igapatuman ang “Alunan doctrine” nga nagalimita sang numero sang mga armado nga gwardiya sang mga politiko sa pungsod nga posible makatuga sang political violence.
Suno kay Duterte, sa idalum sang nasambit nga polisa, duha lamang ka mga bodyguards ang sarang nga maangkon sang kada kandidato kag kun masobra sa duha, makabig na ini nga private army.
Suno sa Presidente, dapat limitahan sang mga kandidato ang ila mga kaugalingon kag kun pamatyagan nila may yara sang pagpamahog batok sa ila, ipatawag sang regional director ukon chief of police kag istoryahon nga likawan lamang ang away ilabi na gamit ang armas.
Ang Alunan doctrine ang gin-introduce ni anay Interior Secretary Rafael Alunan III, nga nagserbi sa idalum sang administrasyon ni Fidel Ramos.
Ginhambalan ni Duterte ang mga law enforcement personnel nga hugot nga iimplementar ini kag nagpaandam sa mga magabayolar sang regulasyon nga sila ang pagaarestuhon ukon iprosecute.
Gindugang man sini nga iya pagakadtuan ang magalapas kag pagaarestuhon ini kag ang iya mga bodyguards bangud indi sila magpasugot nga may yara sang terorismo sa eleksyon.
