Nagpasalig si Presidente Rodrigo Duterte nga handa nga magbulig ang national government sa mga nahalitan sang Typhoon Odette sa Negros Occidental.
Sa interview sang Bombo Radyo kay Governor Eugenio Jose “Bong” Lacson, kahapon sang aga lang ini ginpahibalo nga magapadulong ang Presidente sa probinsya.
Pag-abot sini sa Bacolod-Silay Airport kaupod ang mga secretaries sang Department of Health (DOH), Department of Social Welfare and Development (DSWD), Department of Trade and Industry (DTI), Department of Energy (DOE) kag Department of Transportation (DOTr), nagpatigayon ini sang aerial inspection sa Southern Negros kag nagpadulong sa Kabankalan agud magsapol sa mga alkalde.
Suno kay Lacson, 11 ka mga alkalde lang ang nakatabong kag may yara nga mga nalate apang wala na ginpasulod sa hall.
Sa ginpatigayon nga pagsinapol, nagpasalig si Duterte nga magaabot ang bulig sa probinsya.
Ginpakigbahin ni Lacson sa meeting ang kinahanglanon ang financial assistance sa pagbulig sa mga persona nga nawad-an sang puluy-an.
Nagpasalig naman ang DSWD nga may yara sila sang programa diri kag kinahanglan lang nga magpasa sang report ang probinsya.
Nagpasalig man ang Presidente nga magabulig ini kag magapangita sang P2 billion nga pondo para sa Western Visayas.
Suno sa gobernador, alas 5:00 sang hapon nagsugod ang meeting, nagdugay ini sang duha ka oras kag pagka-alas 7:00 sang gab-i, nagpull-out na ang Presidente kag iya mga Gabinete.
