Ginpahayag ni Presidente Rodrigo Duterte nga ang masunod nga mangin Presidente sa Pilipinas ang dapat nga may “compassion” kag ginapakamaayo sini kun isa ka abogado.
Sa interview kay Pastor Apollo Quiboloy, ginpatpat ni Duterte ang mga kalidad nga dapat pangitaon sang mga Filipino voters sa pagpili sa magabulos sa iya sa pwesto.
Ginpahayag sang presidente nga nakadevelop ini sang ugali nga pagkamaluluy-on bangod sa iya amay nga si late Davao Governor Vicente Duterte, nga nagpakita sang compassion sa mga pumuluyo nga iya ginaserbehan.
Paathag ni Duterte nga dapat ang pilion amo ang may paghigugma sa isig kapareho.
Gindumdom pa sini nga sadto sang ginlahugan sini ang iya amay nga siya ang mangin kongresista sa palaabuton, ginsabat ini sang iya amay nga dapat palanggaon sini una ang mga tawo.
Apang paathag ni Presidente Duterte nga ang iya nga compassion ang malip-ot lang para sa mga imbulbado sa iligal nga droga.
Suno diri, maluluy-on siya apang kun durugista na, mas maayo nga magbiya na sa pagbuhat sang iligal bangod iya ini nga pagatiruhon.
Nahibaluan nga ang Duterte Administration ang nagapangatubang sang posibilidad sa dugang pa nga imbestigasyon sang International Criminal Court (ICC) maykaangtanan sa gina-alegar crimes against humanity, nga nag-umpisa bangod sa madinuguon nga pagpakig-away sang gobyerno batok sa iligal nga droga.
Ang imbestigasyon sang ICC, nga gindeffer sang Nobyembre 2021 sa request sang Philippine government, ang nagtuhaw gikan sa mga reklamo sang mga pamilya sang mga nagkalamatay bangod sa drug war, kasubong man complaints gikan sa human rights advocates.
Santo sa record sang gobyerno, masobra 6,000 ka mga drug suspects ang napatay sa mga anti-drug operations sang mga kapulisan sumugod sang nag-assume sa pwesto si Presidente Duterte sang Hunyo 30, 2016.
