Nagdangat sa halos isa ka libo nga mga traditional jeepney driver’s kag operators ang nagtipon sa old airport sa Barangay Singcang, Bacolod City kahapon sa ginpatigayon nga transport strike.
Ini bilang pagpamatok sa deadline sang consolidation process, nga nagakahulugan man nga sila nga mga unconsolidated jeepneys ang kabigon na nga colorum sumugod subong nga adlaw, Mayo 1.
Sa interview sang Bombo Radyo Bacolod kay Bacolod Alliance of Commuters Operators and Drivers Inc. (BACOD) President Rudy Catedral, sila ang liwat pa nga magapatigayon sang transport strike subong nga adlaw kag ginalauman nga masobra dos mil ang magapartisipar bangod maga-upod diri ang iban pa nila nga miyembro gikan sa gwa sang Bacolod.
Sila ang naga-singgitan nga mabalik ang 5-year franchise kag pahanugutan ang individual operators.
Panindugan ni Catedral nga sila ang wala nagapamatok sa public utility vehicle (PUV) modernization program, sa baylo sila ang batok sa sistema sang pagpatigayon sini.
Ginakwestyon man sini ang ginpagwa nga statement sang Bacolod City government nga indi apektado ang riding public kag ang pahayag sang Land Transportation Franchising and Regulatory Board (LTFRB) Region 6 nga wala sang mihura ang ila transport strike.
Suno diri, ginreport sang mga ini nga 85 porsyento na ang consolidated traditional jeepney sa Bacolod, apang sa kamatuoran yara lamang sa 23 percent.
Nagapati si Catedral nga bangod sa limitado lamang nga modernized jeepneys kag pagdula sa linibo nga traditional jeepneys, ini ang magatuga sang transport crisis sa Bacolod City.
Suno diri, magapadayun sila sa pagbyahe kag ginhangkat man sini ang mga katapo sang Land Transportation Office (LTO) nga sila ang dakpon.
Apang paandam sini nga dapat alalangay ang pagpangdakop kag indi kaangay sadto nga ang BACOD members lamang ang ginadumtan.
Gintawag man sini nga nerbyoso ang LTO, kag nahadlok mandakop.
Hugot nga nagapati si Catedral nga wala sang matabo nga dakpanay bangod ginpahayag na sadto sang LTFRB kag Department of Tourism (DOTr) nga wala sang matabo nga dakpanay halin Mayo 1 tubtob 20, sa baylo ang madakpan ang dagdagan lamang sang show cause order.
Ini ang magaserbe naman nga pamaagi agud mag-atubang sa ila si LTFRB Region 6 officer-in-charge Atty Salvador Altura.
Kun ginabatikos ang gina-alegar tuktukon nga mga traditional jeepney units, ginapahanumdom man sini nga ang mga modernized jeepney units sa karun ang phase out naman sa standard nga nagapahayag nga dapat Euro-7 standard na ang makina sa 2027 kag ang Euro 4 standard ang para lamang sa 2016.
