Ginkalipay sang presidente sang Bacolod City Public Teachers Federation ang pag-anunsyar ni Bacolod City Mayor Alfredo “Albee” Benitez nga pasakaan ang Emergency Cost of Living Allowance (E-Cola) sang mga manunudlo sa ciudad.
Sa interview sang Bombo Radyo Bacolod kay Richard Gelangre, principal sa Bacolod City National High School,20 ka tuig na ang naglabay apang wala pa gid napasakaan ang E-cola.
Suno diri, apisar nga idihon pa sa Sangguniang Panlungsod ang inacrease sa E-cola, iya na ginakalipay nga nahatagan ini sang pagtamod sang mga opisyal.
Kun P2,000 nga E-cola ang ginabaton sang mga manunudlo kada bulan, ini ang madugangan na sang P200.
Dugang pa sini, ila man ginkalipay ang pagpasar sa pagpasaka sang Teaching Supplies Allowance sa P10,000.
Nagapasalamat si Gelangre sa tanan nga estudyante nga nagdumdum sa ila mga manunudlo sa adlaw sang World Teacherss Day kasubong man nga ginpasalamatan sini ang tanan nga sakripisyo sang mga manunudlo sa pagpa-alam sa mga kabataan.
