Ginakalipay sang Presidente sa Negros Oriental Chamber of Commerce and Industry (NOCCI) nga ginahatagan pagtamod sang pila ka kandidato subong man ni Negros Occidental Governor Eugenio Jose “Bong” Lacson nga mabalik ang Negros Island Region (NIR).
Suno kay Edward Du, naglaom ang mga ini nga sa pagtake-over ni Presidente Rodrigo Duterte sang 2016, igapadayun sini ang Negros Island Region nga gintukod sang administrasyon ni late President Benigno “Noynoy” Aquino III sang 2015, apang ini ang gin-abolish sang karun nga administrasyon.
Suno diri, mas maayo kun magpahayag sang commitment ang tanan nga mga kandidato nga seguruhon ang pagbalik sang NIR.
Ginalantaw sini nga sa panibag-o nga administrasyon sa 2022, mahimo man ang mga ini makapagwa sang Executive Order bilang inisyal nga tikang sa pagpabalik sang NIR samtang mas maayo kun ini ang pagahimuon mismo nga Congressional Law.
Pahayag ni Du nga kun may magbisita na sa Negros Oriental nga Presidential Candidate, magarequest ang business sector nga magpagwa ang mga ini sang Official Announcement sa pagsuporta sa revival sang NIR.
Suno diri, tuman ka lip-ot lang ang pag-operar sang NIR bangod ini ang gilayon nga gin-abolish sang 2017.
Personal nga mapamatud-an ni Du nga dako ang nangin bulig sang NIR sa mga negosyante sa Negros Oriental kag mas mapadasig pa ang pag-prubar sang mga proyekto may kaangtanan sa bilog nga Negros Island.
Kalakip sa mga dako nga proyekto sa idalum sang NIR nga na-aprubahan amo ang pagpatukod sang Panay-Guimaras-Negros bridge kasubong man ang Airport Project sa Bacong, Negros Oriental.
Sa karun, nagapadayun pa ang negosasyon sang duta nga tukuran sang airport kag target sang mga ini nga makapatigayon sang ground breaking sa Marso 2022.
Ang mga makabig Mega projects sang NIR ang nag-umpisa sang 2016 kag nafinalize sang 2017 antes paman gin-abolish ang Negros Island Region.
