Nagalaum ang Bacolod Alliance of Commuters, Operators, and Drivers (BACOD-Manibela) nga malakip ang problema sang mga transport sector sa State of Nation Addres ni President Ferdinand “Bongbong” Marcos Jr.
Sa interview sang Bombo Radyo Bacolod kay Bacod-Manibela President Rudy Catedral, ginpahayag sini nga padayon nila nga panawagan sa gobyerno ang paghatag sang soluyson sa problema kaangay sang a asud-asud nga pagsaka sa presyo sang produktong petrolyo kag paghatag sang ayuda sa mga transport sector kun sa diin wala sang ginapili kag tanan ang makabenepisyo.
Nagalaum man ini nga mabuhinan ukon makakas ang excise tax agud mapanubo ang presyo sang produktong petrolyo apang suno diri, ini ang madugay kag indi mahapos bangud yara na ini nga daan sa layi.
Gani suno diri, isa sa pinakadasig nga bulig para sa ila amo ang P10 tubtob P15 nga discount sa mga gasoline station kag dapat ang tanan nga public utility drivers ang may discount.
Sa pihak nga bahin, ginpahayg ni Catedral nga indi sila mag-upod sa rally kadugan sa SONA sang Presidente bangud wala man sila ginmanduan sang ila national chairman nga si Mario “Mar” Valbuena Jr.
