Ginabantayan sa karun sang sugar planters sa probinsya sang Negros Occidental ang kaso nga ipasaka batok sa miyembro sang Sugar Regulatory Administration Board matapos nga madakpan ang pag-import kuntani sang 300,000 metric tons sang kalamay.
Suno kay Manuel Lamata, presidente sang United Sugar Producers Federation (UNIFED), dapat maghalin na sa pwesto si SRA administrator Hermenegildo Serafica apang walang ini makahibalo kun ngaa indi sini luyag nga maghalin bilang administrator sang SRA apisar pa nga nadiskubrehan na ang pag-import kuntani sang kalamay kag ginbasura man sang presidente.
Santo sa nakuha sini nga impormasyon, sa tion nga nadayon ang importasyon sang kalamay ginaaligar nga may yara sang kitaon ang sugar board sang P600 million.
Ang Sugar Order No. 4 ang natalana kuntani nga mag-import sang 300,000 metric tons sang kalamay kag ginalantaw nga magasulod sa pungsod sa bulan sang Oktubre tubtob Nobyembre.
Suno kay Lamata, ginahulat nalang sini ang pagpasaka sang kaso ni Senate President Juan Miguel Zubiri batok sa miyembro sang sugar board.
Nagapati man ini nga dako man ang naamot sang impormasyon nga napadangat nila kay President Ferdinand “Bongbong” Marcos sa tanan nga nagakatabo.
Wala man sang natabo nga survey apisar nga makapila niya ini nga ginsulit-sulit pahayag nga kinahanglan anay sang survey ang mga sugar centrals agud nga mahibaluan ang kulang sa supply sang kalamay antes mag-import apang wala ini natabo bangud lain man ang hampang ni Serafica.
Ginapaabot man ni Lamata nga sa masunod nga inadlaw, may yara na sang development kag ginalantaw nga mapasaka na sang senate president ang kaso batok sa SRA board.
