Nagapasalamat ang president sang United Sugar Producers Federation (Unifed) matapos nga nagresign na sa pwesto si Sugar Regulatory Administration (SRA) Administrator Hermenigildo Serafica sang Agosto 10 apang nangin epektibo sang Agosto 15.
Sa interview sang Bombo Radyo Bacolod kay Manuel Lamata, nagapasalamat ini sa Ginoo, President Ferdinand “Bongbong” Marcos Jr., Senator Imee Marcos kag kay Senate President Juan Miguel Zubiri matapos nga gindeklarar nga unauthorize kag illegal ang Sugar Order No. 4 kasubong man ang pagduso sang imbestigasyon sa kontrobersyal nga sugar order.
Suno kay Lamata, ginpahibalo sila sang SRA nga ginsugo ang mga ini ni Presidente Ferdinand “Bongbong” Marcos Jr. nga magkuha sang ila board resolution bangud kinahanglan nga mag-import sang kalamay.
Suno diri naghatag man siya sang iya nga board resolution bilang presidente sang Unifed apang dapat refined sugar ang tanan nga igaimport 300,000 metric tons nga kalamay.
Apang gin-athag sini nga wala niya ginapaboran nga tungaon ang 300,000 metric tons sa refined sugar kag raw sugar bangud nagaumpisa na ang galing sa karun kag damo na ang raw sugar.
Suno kay Lamata, ang raw sugar puede man mahimo baklon locally kag himuon nga refined sugar bangud nagaumpisa na ang galing subong kag paagi diri mabuligan pa ang local sugar farmers.
