Nagtambong sa iya labing una nga debate si Presidential aspirant Ferdinand “Bongbong” Marcos Jr. antes ang May 2022 elections kag nag-atubang sa tatlo ka iban pa nga mga aspirants.
Ginpakigbahin ni Marcos ang iya plano para sa pungsod kaupod sanday labor leader Leody de Guzman, former defense chief Norberto Gonzales kag former Palace spokesperson Ernesto Abella.
Ang debate, nga gin-organisa sang broadcasting arm ni Pastor Apollo Quiboloy, nga una na nga nag-endorso sa election bids sanday Marcos kag vice-presidential candidate Mayor Sara Duterte, ang ginpamalibaran naman sanday Vice President Leni Robredo, Senator Panfilo Lacson, Senator Manny Pacquiao kag Mayor Isko Moreno bangud sa konflikto sa schedule kag personal nga rason.
Sa pahayag ni Marcos sa debate, nagapati ini nga ang pag-isa ang una nga tikang agud makaatubang sa maskin ano man nga pagpanghangkat sa pungsod lakip na ang pagbangon nagikan sa krisis sang pandemic kasubong man sang ekonomiya.
Bukas man ini nga idisclose ang iya SALN sa publiko kun siya ang magdaog, indi kaangay sa una sini nga pahayag nga iya ini igareject kun gamiton sa pamulitika.
Ang mga presidential candidates nga nakigbahin sa debate ang nagsabat sa mga pamangkot tuhoy sa forging alliances sa iban nga pungsod, tension sa West Philippine Sea, problema sang pungsod sa insurhensya, edukasyon kag food security.
Suno kay Marcos, magafocus ini sa paghimo sang mga trabaho partikular na para sa MSMEs paagi sa pag-improve sang sektor sang agrikultura kag tourismo.
Sa foreign policy, ginpahayag ni Marcos nga dapat magfocus ang gobyerno sa interest sang Pilipinas kag dapat mangin kabahin ang pungsod sang foreign policy sang iban nga nasyon.
Sa pagprotekta sa mga mangingisda sa West Philippine Sea, ginpahayag ni Marcos nga dapat himuon sang gobyerno nga prayoridad ang pagsiguro nga makablik sa ila fishing areas ang mga mangingisda.
Dapat man ikonsiderar sang gobyerno ang pagbaton sang military presence agud masiguro ang soberanya sang pungsod sa area.
Sa food security, ginpropose ni Marcos nga mag-invest sa research and development agud mabuligan ang pagpatubo sang mga varietes sang bugas.
Ginduso man sini ang paghatag sang dugang nga assistance sa mga mangunguma.
Tuhoy naman sa kalinong kag seguridad, ginpahayag sang anay Senador nga dapat depensahan sang estado ang iya kaugalingon.
Suportado sini ang resumption sang peace talks sa tunga sang gobyerno kag komunista nga grupo.
Ginaduso man sini ang pagpadayon sang Balik-Loob Program kag gindayaw ang trabaho sang NTF-ELCAC sa pag-address sang armed conflict.
Suno kay Marcos, wala pa ini sang record kun sin-o ang mga nagbulig sa iya finance sang iya kampanya.
Nagapati man ini nga ang education system sa pungsod ang sarang nga ma-imrove paagi sa paghatag sang mga manunudlo sang nagakaigo nga suporta kag pag-upgrade sang educational facilities.
Sa pagprotekta sang indigenous people, ginpahayag sang presidential aspirant nga dapat irecognize kag ihonor sang gobyerno ang ancestral lands kag kilalahon kun sin-o ang tag-iya sang duta.
