Sa ginpatigayon nga Town Hall Meeting ni Presidential Candidate Ferdinand “Bongbong” Marcos Jr sa Marikina City.
Ginpahayag sini nga mas luyag niya nga pamatian mismo ang mga pumuluyo gani mas ginpakamaayo sini nga magpatigayon sang Town Hall Meeting sangsa nga mag-entra sa debate kun sa diin ginalauman na sini nga magabina-isay kag magabasulay lang ang mga nagapapili sa pwesto.
Nanarisari nga sector ang nagpamangkot sa anay Senador kalakip na sa Health sector.
Pahayag ni Marcos nga luyag sini nga ang paghatag sang health insurance ang mangin family-based.
Aminado naman ini nga may nagakaigo nga pondo sa Philhealth, apang indi maayo ang pagpadalagan sa ahensya.
Plano ni Marcos nga iredesign ang Philhealth agud nagakaigo nga health insurance sa general public.
Ini ang ginpaanggid naman sini sang siya ang Gobernador pa sa Ilocos Norte kun sa diin nahimo man sini mahatag ang health insurance sa publiko.
Apang isa sa kabudlayan sini sa pagpatuman amo ang tuman ka dugay nga paghulag sang Philhealth kun sa diin sa validation palang sang pamilya nga makabatun sang benepisyo nagdangat na sa duha ka tuig.
Dugang pa sini nga tuman ka dako sang mortality rate ukon nagakapatay bangod nabudlayan ang mga pumuluyo sa pagpa-ospital kag masami nagapakonsulta nalang kun malala na ang ginabatyag.
Ginaduso ni Bongbong Marcos ang pagtukod sang mga Rural Health Unit (RHU) nga bisitahan sang mga doktor, nurses kag midwife apat ka beses sa isa ka semana.
Kun may mga RHU sa kada baranagy mas malapit sa tawo ang serbisyo medikal.
Dugang pa sini nga mabulong sa sentro ang mga regular nga balatian agud nga ang mga seryuso nga balatian nalang ang kianahanglan nga dal-on sa ospital.
Aminado si Marcos nga wala pa sang nagakaigo nga pondo ang gobyerno agud mapatuman ang Universal Healthcare Law ukon RA 11223.
Pahayag sini nga dapat una makagwa sa pandemic crisis ang pungsod kag matutukan ang economic recovery, agud tayuyon na ang pondo sa programa.
Ginaduso ni Marcos ang Jabs to Jobs kun sa diin ginalantaw sini nga kun makabatun na ang kadam-an sang immunity sa COVID-19 makabalik naman sa trabaho ang mga pumuluyo kag indi na kinahanglan maggastos sang gobyerno sa mga PPEs kag iban pa nga pandemic response, gani makatipon sang pondo sa pag-implementar sang mga health programs.
Ginaduso man sini ang pagdugang sang Specialize Hospital kaangay sang Heart, Lung kag Kidney Center kasubong man ang pagtukod sang mga tertiary level hospital sa mga probinsya nga wala pa sini, agud nga indi na magtingob pa ang mga pasyente sa mga regional hospitals.
