Indi magtambong si Presidential candidate Ferdinand “Bongbong” Marcos Jr. sa debate nga gin-organisa sang Commission on Elections sa Marso 19.
Ini ang ginkumpirmar sang iya tagpamaba nga si Atty. Vic Rodriguez.
Suno kay Rodriguez, pagatumanon ni Marcos ang iya mga tinaga nga ginbuy-an sa iya mga supporters nga mag-upod sa mga ini sa field sa nasambit nga adlaw.
Suno diri, magapadayon ang kampo ni Marcos sa mas luyag sini nga mode sang direct communication sa mga pumuluyo kag mag-engage sa mga ini sa mas personal face to face interaction kag diskusyunan ang mga matuod-tuod nga issues nga nagaapekto sa pungsod sa karun.
Una naman nga ginpahayag sang running mate ni Marcos nga si Davao City Mayor Sara Duterte nga magakampanya man ini nga wala nagaintra sa mga debate.
Madumduman nga wala man nagtambong si Marcos sa mga presidential interviews sang pila ka networks kasubong man sa forum nga gin-organisa sang Kapisanan ng mga Brodkaster ng Pilipinas apang nakigbahin ini sa debate sang SMNI.
