Indi maayo nga balita para sa mga motorista bangud madugangan naman ang ila nga kabudlayan matapos nga nagpatuman ang mga oil firm sang bigtime oil price hike.
Sa separado nga advisories gin-anunsyar sang Seaoil Philippines Corp. and Shell Pilipinas Corp. nga nagsaka ang presyo sa kada litro sang gasolina sang P1.50; P2.10 sa kada litro sang diesel kag P1.20 sa kada litro sang kerosene.
Ang adjustments ang nag-epekto alas 6:00 kaina sang aga, Nobyembre 12.
Suno kay Rodela Romero, Assistant director sang Oil Industry Management Bureau sang Department of Energy, ang pagtaas sa presyo sang gatong ang bangud sa paghina sang balor sang peso kag serye sang hurricanes sa Gulf of Mexico sa diin nahamtang ang oil rigs sang Estados Unidos.
Sang tinalikdan nga semana, nagpatuman sang rollback nga P0.10 sa kada litro sang gasolina samtang pagsaka nga P0.75 sa kada litro sang diesel kag P0.50 sa kada litro sang kerosene.
