Ginpasalig sang cluster head on markets sa syudad sang Bacolod nga wala nagsaka ang presyo sang agricultural products sa mga merkado sa syudad sang Bacolod apisar sang tuman nga pagsaka sang presyo sang produktong petrolyo.
Suno kay Executive Assistant to the Mayor Ernie Pineda, ang mga agricultural products kaangay sang mga utanon kag panakot ang wala na-apektuhan sa pagmahal sang gatong sa baylo nagnubo pa ang presyo sa mga merkado.
Samtang ang poultry kag meat products ang wala man sang nangin pagsaka sa presyo.
Suno kay Pineda ang presyo sang karne sang baboy ang nagapabilin sa P290 ang kada kilo sa Central, Libertad, Burgos Public Market.
Ang bilog naman nga manok ang mabakal subong nga semana sa P174 apang kahapon nagpanaog ini sa P155 sa Libertad Public Market.
Ang mga panakot kaangay sa sibuyas kag bombay ang nagpanaog na sa P65 ang kada kilo, P80 tubtob P90 ang ahos samtang dako naman ang ginubo sa presyo sang luy-a nga anay P100 karun P60 nalang ang kilo.
Ang presyo sang Bangrus ang yara naman sa P240 ang kada kilo, Tilapya sa P150 kada kilo kag kasubong man sa Marot.
Apang ang presyo sang Marot sa Burgos kag Central Marker ang yara sa P180 ang kada kilo.
Samtang nagadagsa naman ang isda nga Tuloy gani ang presyo ang yara nalang sa P100 kada kilo.
Ini naman ang nagbutong sa presyo sang iban pa nga mga isda bangod nagakapilitan sa pagpanubo sang presyo ang mga fish vendor ilabi na nga ang mga manugbakal ang nagapili sa kun ano ang mas barato.
