Aminado ang manugbaligya sang bombay sa Libertad Public Market sa syudad sang Bacolod nga nagnubo na ang presyo sang bombay.
Sa interview sang Bombo Radyo Bacolod kay Leni Vallejo, nagmaayo na ang pagbaklanay sang bombay apang gin-athag man sini nga wala siya sang ginkuha nga imported nga nga bombay bangud sa Luzon ini nagakuha sang supply.
Suno kay Vallejo, nag-umpisa sa pagnubo ang presyo sang bombay sa una nga sinemana sa bulan sang Enero subong nga tuig.
Ginpahayag man sini nga mas ginapili sang mga customer ang magbakal sang locally-produced sa nga mga bombay.
Suno diri, bisan ang supply sang puti nga bombay sa Manila kag sa Mindoro sila nagakuha kag wala sila nagakuha sang imported bangud mas manami gamiton ang lokal kumparar sa imported.
Ang magagmay nga bombay ang mabakal sa P280.00 kada kilo samtang puti ukon yellow nga bombay ang mabakal sa P350.00 kada kilo.
Suno kay Vallejo may nagabakal man sa ila sang sinako apang malaka lang bangud libo man ang bili sang napulo ka kilo kada sako.
Ginalantaw man sang mga ini nga maganubo ang presyo sang bombay sa bulan sang Pebrero.
Suno diri, ginalantaw naman nga sa bulan sang Mayo tubtob sa Hunyo magasaka ang presyo sang bombay.
Samtang ang presyo naman sang ahos ang wala nagbag-o kag ang supply ang gin-import pa nagikan sa Taiwan.
