Ginpahayag sang Provincial Veterinarian sa Negros Occidental nga magluwas sa pagtaas sang presyo sang Harina, Kalamay kag Tinapay, dako man ang pagsaka sa presyo sang broiler ukon dressed chicken.
Suno kay Dr. Renante Decena, head sa Negros Occidental Provincial Veterinary Office, gamay lang ang pagsaka sa presyo sang karne sang babot kag baka apang dako ang pagmahal sa presyo sang manok.
Santo sa weekly monitoring, nagabarato man ang presyo kun madamo sang maihaw sa isa ka semana.
Apang may mga lugar ilabi na sa sur nga bahin sang probinsya nga manubo ang supply gani nagasaka man ang presyo sang karne.
Dugang pa nga naga-apekto sa presyo amo ang pagmahal sang soy beans kag mais nga nagapanguna nga ingredients sa paghuman sang bubod.
Ang pinakamataas nga presyo sang Dressed Chicken ang nagadangat sa P225 gikan sa anay P130 lang nga presyo.
Naggamay naman ang supply sang broiler bangod madamo sang mga natumba nga broiler farms sa sur nga bahin sang Negros Occidental.
Sa karun ang mga integrators ang nagapangita sang malawig nga mga kontrata kaangay nalang sang lima ka tuig para sa tunnel vent, samtang tatlo ka tuig naman sa conventional farms.
Paathag ni Decena nga kalabanan sa mga naghagmak nga broiler farms bangod sa bagyo Odette amo ang conventional.
Ginalauman naman nga subong nga tuig, magkalaislan na ang mga dalagko nga imprastraktura.
Aminado naman ini nga ang problema sang dalagko nga frams nga naguba amo ang banking kag finance, ilabi na nga ang dalagko nga negosyo ang masami nagaagi sa loan.
Positibo naman si Decena nga makarecover ang produksyon subong nga tuig ilabi na nga ang cycle ang nagadangat sa walo ka beses sa isa ka tuig.
Suno kay Decena, ang away sa tunga sang America kag Russia ang nagatuga sa pagkadelay sang delivery sang soy beans nga naga-apekto sa presyo sang feeds sa Pilipinas.
Sa pihak nga bahin gamay lang ang pagsaka sa presyo sang itlog kun sa diin yara lang sa 10 tubtob 25 sintimos.
