Nagpaandam ang Department of Agriculture (DA) sa posible nga pagsaka sang presyo sang bugas kag iban pa nga balaklon sa bulan sang Agosto, sa pihak sang pasalig nga may-ara sang bastante nga suplay ang pungsod sa masunod nga mga binulan.
Suno kay Agriculture Secretary Francisco Tiu Laurel Jr., ang ginapaabot nga pagsaka sang presyo ang direkta nga epekto sang nagapadayon nga pagsaka sang presyo sang langis sa global market.
Suno diri, indi malikawan ang pagsaka sang presyo bangud nagadugang man ang gastos sa abono, transportasyon, kag logistics.
Suno kay Laurel, mahimo magsaka ang presyo sang well-milled rice humalin sa P45 mangin P70 kada kilo antes matapos ang tuig kun magpabilin nga taas ang presyo sang langis bangud sa tensyon sa Middle East.
Dugang pa diri, kun magdangat sa $200 kada bariles ang langis, mahimo magsaka ang presyo sang manok humalin P200, mangin P324.64 ang kada kilo kag samtang ang pork liempo kag pigue ang posible magdangat sa P588.10 humalin sa P350.
Gani nagapanawagan si Laurel sa gobyerno nga pabaskugon sini ang price monitoring, targeted food assistance, buffer stock releases, kag price caps.
