Suli sa pahayag ni President Ferdinand Marcos Jr. nga malapit na lamang malab-ot ang P20 nga kada kilo sang bugas, mas nagsaka na gid ang presyo sini sa Burgos Public Market.
Sa interview sang Bombo Radyo kay Reynalin Tiaga, retailer sang bugas sang Burgos Public Market, P36 per kilo ang pinakanubo nga presyo sang bugas apang ini ang dog rice.
Nagasunod diri ang P39 per kilo, P40, P42, P45, P46 kag P47 per kilo naman ang pinakamahal.
Suno kay Tiaga, Jasmine rice ang tag-P47 per kilo kag ini ang nagikan sa Vietnam.
Ang tag-P36 naman ang locally produced lamang kag nagikan sa Bago City kag Iloilo.
Suno sa iya, tag P1,750 ang kada sako sang tag P36 nga bugas; P1,950 ang kada sako sang P40; P2,080 ang kada sako sang tag P45; kag P2,150 naman ang kada sako sang P46 tubtob P47 nga bugas.
Suno diri, sang tinalikdan nga semana, mas manubo ang presyo sini sa merkado apang sa karun, ini ang nagsaka na.
Maayo man kuntani suno kay Tiaga ang pahayag sang Presidente nga himuon sini tag-P20 ang kada kilo sang bugas apang tubtob sa karun wala ini gihapon matuman kag kun tulukon ang sitwasyon, ginalauman nga mas magasaka pa ang presyo sini sa palaabuton.
