Nakadepende sa supplier kun magasaka ang presyo sang bulak para sa fiesta minatay.
Sa pagtsekyar sang Bombo News Team sa likod sang Bacolod Arts and Youth Sports Center (BAYS Center), amat-amat na nga nagaplastar ang mga flower vendors sang ila nga mga bulak para sa tigkalalag.
Sa interview sang Bombo Radyo Bacolod kay Diotay Alarba, tag-iya sang Diotay’s Flowershop, sa mga nabakal nila nga bulak gikan sa Cebu, Manila, kag Benguet, halos parehas lamang ang presyo sa nakaligad nga tuig.
Suno diri, mabal-an pa kun may pagbag-o sa presyo sa pag-abot sang mga bag-o nga bulak sa Oktubre 28.
Ang mga ginagamit nga accent ang gikan sa banwa sang Murcia.
Suno kay Alarba, ang ila ginabaligya nga bulak nga naka-basket ang mabakal sa presyo nga P150 tubtob P200; ang mga yara sa paso ang mabakal naman sa balor nga P300; samtang ang pinakamataas nga balor sang flower arrangement ang yara sa P1,000 tubtob P1,500.
May-ara man sila sang bulak nga nabutang sa stand, nga mabakal man sa balor nga P1,500, nga may kaupod na nga lettering.
Suno diri, wala pa sa karun sang nagapareserve, apang sa masami may mga temprano pa nga nagapareserve sang bulak, kag may-ara man nga nagabisita na sa patro sa Oktubre 31 pa lamang.
Ang mga bulak ang sarang man maglawig sang apat tubtob lima ka adlaw depende sa kainiton sang area nga butangan.
