Nagpatuman ang mga oil firms sang dako nga pagnubo sa presyo sang produktong petrolyo subong nga aga.
Ini na ang ikatatlo nga semana nga asod-asod nga pagpatuman sang rollback para sa gasolina kag ikalima naman para sa diesel kag kerosene.
Sa separado nga advisories, ang Chevron Philippines Inc. (Caltex), Flying V, Petron Corp., Seaoil Philippines Corp. kag Shell Pilipinas Corp. ang nagpatuman sang P2.45 nga rollback sa kada litro sang gasolina; P1.90 sa kada litro sang diesel kag P2.40 sa kada litro sang kerosene.
Ang Cleanfuel, Petro Gazz, PTT Philippines Corp., kag Unioil Petroleum Philippines Inc. ang magapatuman sang pareho nga price adjustments magluwas nalang sa kerosene nga wala sa ila nga produkto.
Nag-epekto ang price adjustment alas 6:00 ang takna kaina sang aga sa mga oil firms magluwas sa Cleanfuel nga nagtake effect ang price adjustment alas 12:01 ang takna kaina sang kaagahon.
Sang tinalikdan nga semana, nagpatuman ang oil firms sang price rollback nga P0.10 sa kada litro sang gasolina, P0.20 sa kada litro sang diesel kag P0.45 sa kada litro sang kerosene.
